लोणावळा, ता.१९ : वेहेरगाव (ता.मावळ) येथे तळ्यात बुडून तरुणाचा मृत्यू झाला. ही घटना मंगळवारी (ता.१९) उघडकीस आली. भूषण मंगेश म्हात्रे (वय २३, रा.ट्रॉम्बे, मुंबई) असे बुडालेल्या तरुणाचे नाव आहे. मृत भूषण मित्रांसमवेत एकविरा देवीच्या दर्शनासाठी आला होता. मंगळवारी सकाळी वेहेरगाव येथील तळ्यात पोहण्यासाठी गेला असताना दमछाक झाल्याने तो बुडाला. शिवदुर्ग मित्र बचाव पथकातील प्रवीण देशमुख, अजय शेलार, चंदुभाऊ बोंबले, यश सोनवणे, गौरव कालेकर, कुणाल कडू, महेश मसणे, पिंटू मानकर यांनी मदत कार्य राबवत भूषण याचा मृतदेह बाहेर काढला. पुढील तपास लोणावळा ग्रामीण पोलिस करत आहेत.