लोणावळा, ता. १२ ः इस्रो आणि डीआरडीओमध्ये प्रवेश घेण्यासाठी विद्यार्थ्यांनी उद्युक्त व्हावे,यासाठी कल्पना चावला स्पेस ॲकॅडमी दीपस्तंभाप्रमाणे कार्यरत आहे. भविष्यात येथून अंतराळ शास्त्रात प्रवीण असे विद्यार्थी घडत अंतराळ वैज्ञानिक तयार होतील, अशी आशा कल्याणी ग्रुप भारत फोर्जचे उपाध्यक्ष जितेंद्र पाटील यांनी व्यक्त केली.
विद्यानिकेतन एज्युकेशन ट्रस्टच्या ॲड. बापूसाहेब भोंडे हायस्कूलमधील कल्पना चावला स्पेस ॲकॅडमीमध्ये राष्ट्रीय अंतराळ दिन साजरा करण्यात आला. यानिमित्त तीन दिवसीय कार्यक्रमांचे उद्‍घाटन जितेंद्र पाटील यांच्या हस्ते गुरुवारी (ता. ११) झाले. यावेळी ते बोलत होते.
संस्थेचे अध्यक्ष व ॲकॅडमीचे विश्वस्त ॲड. माधवराव भोंडे, उपाध्यक्ष नारायण भार्गव, सचिव राधिका भोंडे, व्यंकटेश गंभीर, राजीव साही, संजीव वीर, प्रकल्प संचालक पुष्पेंदु रक्षित आदी याप्रसंगी उपस्थित होते. साईन शो फ्रीझ ईट, प्लॅनिटोरियम शो, रोबोटिक्स सायन्स एज्युकेशन आदीचे आयोजन करण्यात आले. पिंपरी-चिंचवड सायन्स पार्कचे या उपक्रमाला सहकार्य मिळाले. याचबरोबर एआय आणि रोबोटिक्स स्पेस सायन्स एज्युकेशन कार्यशाळा, नॅशनल सायन्स चॅलेंज या विषयावर प्रकल्प स्पर्धा होणार आहेत. तीन दिवसीय उपक्रमात एक हजार विद्यार्थी सहभागी होणार असून, इस्रोचे शास्त्रज्ञ यावेळी उपस्थित राहणार आहेत. ६० विद्यार्थ्यांनी केलेल्या ‘स्पेस जर्नी’ या अंतराळशास्त्र व तंत्रज्ञान याविषयीच्या प्रकल्पांचे प्रदर्शन, चांद्रयान प्रतिकृती, अंतराळवीर प्रतिकृतीचे यावेळी उद्‍घाटन करण्यात आले.
---