लोणावळा, ता.१० : नगर परिषदेच्या निवडणुकीत नांगरगाव प्रभागातून शिवसेनेच्या उमेदवाराने उमेदवारी अर्ज बुधवारी (ता.१०) माघारी घेतला.
नांगरगाव प्रभाग क्रमांक ५ ब-सर्वसाधारण जागेसाठी तसेच गवळीवाडा प्रभाग क्रमांक १० अ-नागरिकांचा मागासवर्ग-महिला या दोन जागांसाठी मतदान प्रक्रिया निवडणूक आयोगाच्या वतीने स्थगित करण्यात आली होती. नगराध्यक्ष पदासह उर्वरित बावीस जागांसाठी दोन नोव्हेंबरला मतदान पार पडले.
दोन प्रभागांतील दोन जागांसाठी निवडणूक आयोगाच्या सुधारित वेळापत्रकानुसार येत्या शनिवारी (ता.२०) निवडणूक होत आहे. त्यासाठी अर्ज माघारीची उद्यापर्यंत (ता.११) मुदत आहे.
गवळीवाडा येथे एका जागेसाठी काँग्रेस आणि भाजप अशी लढत होत आहे. तर नांगरगाव येथे भाजप, शिवसेना, राष्ट्रवादी काँग्रेस व अपक्ष असे चार जण रिंगणात होते. पैकी शिवसेनेचे उमेदवार विवेक भांगरे यांनी माघार घेतल्याने भाजप व राष्ट्रवादी काँग्रेसमध्ये सामना होणार आहे.