लोणावळा, ता. १४ : स्काऊट गाइड फेलोशिप लोणावळा गिल्ड यांच्या वतीने वलवण येथील हरी गोविंद वृद्धाश्रमात विशेष कार्यक्रमाचे आयोजन करण्यात आले. यावेळी वृद्धाश्रमात वास्तव्यास असलेल्या ज्येष्ठ महिलांना फळांचे वाटप करून त्यांचा सन्मान करण्यात आला. आंतरराष्ट्रीय महिला दिनाचे औचित्य साधत शुक्रवारी (ता. १३) आयोजित या उपक्रमामध्ये लोणावळा गिल्डच्या सदस्यांनी वृद्ध मातांप्रति कृतज्ञता व्यक्त करत त्यांच्या चरणांना स्पर्श करून आशीर्वाद घेतले. तसेच वृद्ध मातांशी संवाद साधत त्यांच्यासोबत काही क्षण घालवून आपुलकीची भावना व्यक्त करण्यात आली.
या कार्यक्रमाला रत्नप्रभा गायकवाड, हेमलता शर्मा, अंबिका गायकवाड, पूर्वा गायकवाड आणि सुनील शिंदे यांची उपस्थिती लाभली. लोणावळा गिल्डच्या सदस्यांच्या वतीने वृद्धाश्रमातील महिलांचा सन्मान करण्यात आला. समाजात ज्येष्ठ नागरिकांप्रति विशेषतः ज्येष्ठ महिलांप्रति आदर, संवेदनशीलता वाढावी आणि त्यांच्या जीवनात आनंदाचे क्षण निर्माण व्हावेत, या उद्देशाने हा उपक्रम राबविण्यात आल्याचे आयोजकांनी सांगितले.