लोणावळा, ता.११ : संत शिरोमणी श्री संत नामदेव महाराज यांच्या ६७६ व्या संजीवन समाधी सोहळ्यानिमित्त येथील शिंपी समाज ट्रस्ट यांच्या वतीने विविध धार्मिक, सामाजिक, सांस्कृतिक आणि प्रबोधनात्मक कार्यक्रम पार पडले.
भांगरवाडी येथील श्री लक्ष्मीनारायण गणपती मंदिर परिसरात झालेल्या या सोहळ्यात गुणवंत विद्यार्थ्यांसह ७५ वर्षांवरील ज्येष्ठ नागरिकांचा सन्मान करण्यात आला. तसेच लोणावळ्यातील रेल्वे विभागाच्या श्री संत नामदेव महाराज उद्यानातील नामफलक सुशोभीकरणाचा उपक्रम राबविण्यात आला. विविध वयोगटांसाठी खेळ तसेच मनाचे श्लोक, महालक्ष्मी अष्टक, कालभैरव अष्टक आणि श्रीसूक्त पठण स्पर्धा झाल्या.
समाजप्रबोधनपर व्याख्यानात माऊली दाभाडे यांनी मार्गदर्शन केले. संत नामदेव महाराजांच्या भक्ती, समता, मानवता आणि सामाजिक ऐक्याच्या विचारांवर प्रकाश टाकला. सोहळ्याच्या यशस्वी आयोजनासाठी मिलिंद चिंबळकर, रमेश पिसे, रमेश बारटक्के, कल्पना कल्याणजी यांच्यासह शिंपी समाज ट्रस्टच्या पदाधिकारी व समाजबांधवांचे सहकार्य लाभले.