मोशी, ता. २८ : सदनिकेचा मालमत्ता कर भरला नाही म्हणून मोशीतील सिल्व्हर ओक सोसासायटीचेच नळजोड महापालिकेच्यावतीने तोडण्यात आल्याचा प्रकार घडला. संपूर्ण सोसायटीचेच पाणी बंद केल्याने स्थानिक रहिवाशांच्या पिण्याच्या पाण्याचा प्रश्न अत्यंत गंभीर झाला आहे. सध्या येथे टँकरद्वारे पाणीपुरवठा केला जात आहे.
सिल्व्हर ओक सोसायटीत एकूण २१० सदनिका असून त्यांच्यासाठी एकूण बारा नळजोड आहेत. हे बाराच्या बारा नळजोड तोडण्यात आलेले आहेत. त्यामागे येथील सदनिकाधारकांनी स्वतःच्या सदनिकेचा मालमत्ता कर भरला नसल्याचे कारण दिले जात आहे. मात्र सदनिकांचे क्षेत्र कमी असताना मालमत्ता कर अधिक येत आहे, अशी येथील सदनिकाधारकांचे म्हणणे आहे. त्यामुळे त्यांनी महापालिकेकडे सदनिकांचे क्षेत्र मोजून त्याप्रमाणे मालमत्ता कर आकारणी करावी. त्याप्रमाणे ते लोक भरायला तयारही आहेत. आम्हाला क्षेत्र मोजलेले एक पत्र द्या आणि त्याप्रमाणे कर आकारणी करून द्या. आम्ही तो १०० टक्के कर भरतो, अशी रहिवाशांची मागणी आहे.

पूर्वकल्पना न देता कारवाई...
सोसायटीतील ५० टक्के सदनिका धारकांनी शंभर टक्के कर भरलेला आहे. महानगरपालिकेकडून त्याबाबत रीतसर नोटीस देणे आवश्यक होते. परंतु कुठलीही नोटीस न देता त्यांचेही नळजोड तोडले आहेत. सोसायटीच्या सदस्यांनी एकत्रित येऊन महापालिकेतील अधिकाऱ्याला जाब विचारला. परंतु सर्वप्रथम थकीत कर भरा. त्यानंतरच आम्ही तुमचे नळजोड जोडून देऊ, अशी बोळवण अधिकाऱ्याने केली. त्यामुळे सोसायटीचे अध्यक्ष अविनाश फणसे, सचिव गणेश राऊत, सभासद शैलेश ढवळे, संदीप गाडे, अमित तांबे, नेहा गारगोटे, उर्मिला दंडवते आदींसह २१० सदनिकाधारक सभासद सर्व मार्गांनी प्रयत्न करत आहेत.

राखीव टाकीतील पाणीही संपले
सोसायटीत आगीसारखी एखादी दुर्घटना घडल्यास त्यावर तातडीचा उपाय म्हणून अग्निशमन दलासाठी पाण्याची राखीव टाकी आहे. मात्र, टाकीमधीलही पाणी संपले आहे. अचानक जर येथे आग लागली; तर काय करायचे असाही गंभीर प्रश्न रहिवाशांसमोर निर्माण झाला आहे.