मोशी, ता. १९ : संतश्रेष्ठ ज्ञानेश्वर महाराज यांचा ७५० वा जन्मोत्सव आणि जगतगुरु संत तुकाराम महाराज यांच्या ३७५ वा वैकुंठगमन सोहळा सर्वत्र सुरू आहे. या पार्श्वभूमीवर परतीच्या प्रवासात संत तुकाराम महाराज यांचा पालखी सोहळा मोशी मार्गे आळंदीहून देहूत जाणार आहे. त्यामुळे तुकोबारायांच्या पालखी सोहळ्याचे स्वागत आणि पादुका दर्शनाचा लाभ घेण्यासाठी मोशी ग्रामस्थ स्वागताच्या तयारीला लागले आहेत.
आषाढी वारीनिमित्त जगतगुरु संत तुकाराम महाराज यांचा पालखी सोहळा श्री क्षेत्र पंढरपूरकडे रवाना झाला होता. त्याचा आता परतीचा प्रवास सुरू आहे.
संत तुकाराम महाराज यांचा पालखी सोहळा सोमवारी (ता.२१) आळंदीहून देहूकडे मार्गस्थ होईल. डुडुळगाव, मोशी येथे ग्रामस्थांच्यावतीने सोहळ्याचे स्वागत करण्यात येणार आहे.
पालखी मार्गावर भव्य स्वागत कमानी उभारल्या जाणार असून रस्त्याच्या दोन्ही बाजूने पताका लावल्या जाणार आहेत.
पालखी प्रमुखांसह पदाधिकाऱ्यांचा मोशी ग्रामस्थांकडून सन्मान केला जाणार आहे. पालखीसोबत असलेल्या भाविकांना खिचडी वाटप केले जाणार आहे, अशी माहिती मोशी ग्रामस्थांनी दिली.