मोशी, ता. ७ : पुणे जिल्हा शिक्षण मंडळाचे श्री नागेश्वर विद्यालय, मोशी व भाग शाळा, चिखली येथे नुकतेच अमली पदार्थांना आळा घालण्यासाठी विशेष जनजागृती व समुपदेशन कार्यक्रमाचे आयोजन करण्यात आले.
यावेळी औंध जिल्हा रुग्णालय येथील डॉ. नंदकुमार सातपुते व धनंजय डोंगरदिवे यांनी इयत्ता ८ वी ते १२ वीच्या विद्यार्थ्यांना शासकीय धोरणानुसार अमली पदार्थांचे दुष्परिणाम, व्यसनाधीनतेचे धोके व व्यसनमुक्तीचे मार्ग याबाबत मार्गदर्शन केले.
अमली पदार्थांचे व्यसन हे शरीरासोबतच कुटुंब व समाजालाही पोखरते. विद्यार्थ्यांनी योग्य वेळी सजग राहून व्यसनांपासून दूर राहणे गरजेचे आहे, असे डॉ. सातपुते यांनी सांगितले. तर व्यसनमुक्त जीवन हीच उज्ज्वल भविष्यासाठीची खरी गुरुकिल्ली आहे, असे डोंगरदिवे यांनी नमूद केले.
कार्यक्रमानंतर विद्यार्थ्यांनी व्यसनमुक्तीचे फलक हातात घेऊन विद्यालय परिसरात जनजागृती फेरी काढली. प्राचार्य रामदास सानप यांनी प्रास्ताविक केले. तर शरद वाजे यांनी सूत्रसंचालन केले.