मोशी, ता. २६ : प्राधिकरणातील पेठ क्रमांक चार येथील साईनाथ व श्रीराम मंदिर संस्थेच्या वतीने गुरुवारी (ता. २६) श्री रामनवमी निमित्त विविध धार्मिक व सांस्कृतिक कार्यक्रम पार पडल्याची माहिती संस्थेचे अध्यक्ष श्रीकांत सावंत यांनी दिली.
या प्रसंगी संपूर्ण मंदिराला फुलांसह विद्युत रोषणाईची सजावट करण्यात आली होती. रांगोळ्यांच्या पायघड्या व भगवे ध्वज लावण्यात आले होते.
सकाळी चासकर परिवार यांच्या हस्ते अभिषेक करण्यात आला. त्यांनतर श्रीराम जन्मोत्सव साजरा करण्यात आला. यावेळी महिलांनी फुलांनी सजविलेल्या पाळण्यासह जन्माचे पाळणे म्हटले. सायंकाळी महिला मंडळाच्या वतीने राम रक्षा पठण, संगीत भजनाने प्राधिकरणातील वातावरण भक्तिरसात रंगले. याशिवाय बालकांसाठी रामायण प्रश्नमंजुषा, कीर्तन आणि धार्मिक प्रवचन यांसारखे उपक्रमही घेण्यात आले. अध्यक्ष श्रीकांत सावंत, संभाजी राळे, शंकर मुळे यांसह सर्व पदाधिकारी, विश्वस्त व महिला भाविक उपस्थित होते.