रावेत, ता.२७ ः मुसळधार पावसामुळे आकुर्डी, रावेत आणि निगडी प्राधिकरण परिसरातील नाल्यांमध्ये पाणी पातळीत लक्षणीय वाढ झाली आहे. गेल्या काही तासांतील संततधार पावसामुळे नाले पूर्ण क्षमतेने भरून वाहत आहेत. मात्र, नागरिकांच्या घरांमध्ये पाणी शिरल्याची कोणतीही तक्रार प्राप्त झालेली नसल्याची माहिती महापालिका प्रशासनाने दिली आहे.
‘‘आकुर्डी, रावेत आणि निगडी या भागात पाणी साचण्याचा धोका होता. मात्र, आरोग्य विभागाने वेळे काम पूर्ण केल्यामुळे कोणतीही अडचण निर्माण झाली नाही. पुढील काही दिवसांतही पाऊस राहणार असल्याने महापालिका प्रशासनाने पाणी साचण्याच्या ठिकाणी सतर्क राहावे. तसेच कोणत्याही गैरसोयीपासून बचाव करण्यासाठी खबरदारी घ्यावी.’’, असे आवाहन नागरिकांनी केले आहे. तर पाऊस चालू असताना नागरिकांनी गरज नसल्यास घराबाहेर न पडू नये. गटार किंवा नाल्यांत कचरा न टाकता पाणी प्रवाह सुरळीत होईल, यासाठी सहकार्य करावे, असे आवाहन महापालिका प्रशासनाने केले आहे.

काय आहे परिस्थिती...
- आकुर्डी, रावेत आणि निगडी प्राधिकरणातील नाल्यांच्या पाणी पातळीत लक्षणीय वाढ
- नाले पूर्ण क्षमतेने भरून वाहू लागले, मात्र सफाईमुळे बहुतांश घरांत पाणी शिरण्याचा धोका टळला
- पाणी साचण्याच्या ठिकाणी प्रशासनाने सतर्क राहण्याची नागरिकांची मागणी
- आकुर्डीतील जय भवानीनगर, प्रभात कॉलनीजवळील नाल्यांचे पाणी काही झोपड्यात शिरल्याची तक्रार
- रावेत परिसरात नदीला मिळणाऱ्या छोट्या नाल्यांमुळे रस्त्यांवर पाणी साचले. वाहतूक संथगतीने चालू
- काही ठिकाणी बांधकामामुळे नाल्यांचा नैसर्गिक प्रवाह अडवला गेल्याचे निदर्शनास
- निगडी प्राधिकरणामधील रामनगर, यमुनानगर, यशवंतनगरमध्ये काही ठिकाणी पाणी साचले