सकाळ इम्पॅक्ट

निगडी, ता.९ ः निगडी येथील कै. मधुकरराव पवळे उड्डाणपूल ते चिंचवड स्टेशनपर्यंतच्या मुख्य रस्त्यावरील खड्डे भरण्यास मेट्रो प्रशासनाने सुरुवात केली आहे. मोठ्या खड्ड्यांमध्ये मुरूम आणि डांबर टाकण्याचे काम सुरू झाले आहे.
गेल्या अनेक महिन्यांपासून कै. मधुकरराव पवळे उड्डाणपूल - चिंचवड स्टेशन रस्त्यावर मोठ्या प्रमाणावर खड्डे पडले आहेत. त्याबाबतचे वृत्त ‘सकाळ’ मध्ये प्रसिद्ध झाले होते. त्याची प्रशासनाने तातडीने दखल घेतली.
या रस्त्यावरून रोज हजारो वाहनांची वाहतूक होत असते. त्यामुळे नागरिक, वाहनचालक आणि विद्यार्थ्यांना यामुळे प्रचंड त्रास सहन करावा लागत होता. विशेषतः पावसात खड्ड्यांमुळे अपघाताची शक्यता वाढली होती. पिंपरी-चिंचवड महापालिकेच्या दळणवळण विभाग आणि मेट्रो प्रशासनाने रस्त्याच्या डागडुजीस सुरुवात केली. विशेष म्हणजे, रस्त्यावरच्या मोठ्या खड्ड्यांमध्ये तत्काळ मुरूम आणि डांबर टाकण्याचे काम सुरू करण्यात आले. त्यामुळे नागरिकांनी समाधान व्यक्त केले आहे.
वाहन चालक राहुल देशमुख म्हणाले, ‘‘आम्ही अनेक वेळा तक्रारी केल्या होत्या. पण ‘सकाळ’ ने वृत्त छापल्यामुळेच प्रशासन हलले. हे मान्य करावे लागेल. रस्त्याची डागडुजी करण्यापेक्षा प्रशासनाने कायम स्वरूपी मार्ग काढावा.’’
महापालिकेच्या दळणवळण विभागाचे कार्यकारी अभियंता अभिमान भोसले म्हणाले, ‘‘या रस्त्यावर मेट्रोचे काम सुरू आहे. रस्त्याच्या देखभाल दुरूस्तीचे काम मेट्रो प्रशासनाकडे आहे. त्यासंदर्भात त्यांच्यासोबत पत्रव्यवहार करण्यात आला आहे.’’

नागरिकांच्या सुरक्षेच्या दृष्टीने डागडुजीचे काम युद्धपातळीवर हाती घेतले आहे. पावसामुळे अडचण येत असून लवकरच संपूर्ण रस्ता खड्डेमुक्त करण्यात येईल. मेट्रोचे काम प्रगतीपथावर असल्यामुळे नागरिकांनी सहकार्य करावे.
- योगानंद आतलोरी, निवासी अभियंता, मेट्रो