रावेत, ता.२६ : पाणी साठवण क्षमता वाढविण्यासाठी रावेत येथील जुन्या बंधाऱ्याच्या पुनर्बांधणी व नवीन बंधाऱ्याच्या कामास अखेर मंजुरी मिळाली आहे. जलसंपदा विभागाला सरकारकडून हे काम तातडीने सुरू करण्याचे आदेश देण्यात आले आहेत.
जुन्या बंधारा अत्यंत जीर्ण झालेला असून पावसाळ्यात त्यातून वाहणाऱ्या पाण्यामुळे अनेकदा परिसरात धोका निर्माण होतो. सध्या असलेला बंधारा सुमारे १०० वर्षे जुना असून त्याची क्षमता अपुरी पडत आहे. यामुळे नव्या बंधाऱ्याची उभारणी अत्यावश्यक ठरली होती. जलसंपदा विभागातर्फे नवीन बंधाऱ्याच्या उभारण्यासाठी अर्किटेक्चर यांच्याकडून डिझाईन मागविण्यात आल्या. चार डिझाईन प्राप्त झाल्या असून त्यातील एकाची निवड करुन त्यानुसार पुढील प्रक्रिया सुरू केली जाईल.
नवीन बंधाऱ्यासाठी जलसंपदा विभाग, राज्य औद्योगिक विकास महामंडळ आणि पिंपरी चिंचवड महानगरपालिका यांच्यात समन्वयाने नियोजन करण्यात आले आहे. सुमारे ४.५ मीटर उंचीचा व २७६ मीटर लांबीचा हा बंधारा बांधण्यात येणार आहे. यासाठीचे खर्च वरील सर्व संस्थांकडून करण्यात येणार असल्याची माहिती आहे.

नवीन बंधाऱ्याच्या कामासाठी जलसंपदा विभागातर्फे प्रक्रिया सुरू आहे. यासाठी वेगवेगळ्या डिझाईन्स मागविण्यात आल्या. व त्यातून चार डिझाईन प्राप्त झाल्या. त्यापैकी योग्य डिझाईन निश्चित करून पुढील प्रक्रिया पूर्ण करण्यात येणार येईल.
- संकेत पतंगे, सहाय्यक अभियंता, जलसंपदा विभाग