रावेत, ता. ९ : पिंपरी चिंचवड महानगरपालिकेतर्फे स्मार्ट सिटी अंतर्गत रावेत परिसरातील लोहमार्गालगत विकसित ‘इको जॉगिंग ट्रॅक’ ची मोठ्या प्रमाणावर दुरवस्था झाली आहे. ‘टर्फलेट’ अंतर्गत हरित क्षेत्राची वाताहत झाली आहे.
नागरिकांना व्यायामासाठी जागा असावी या हेतूने महापालिकेकडून हे ‘इको जॉगिंग ट्रॅक’ विकसित करण्यात आले. नवीन झाडांची लागवड करून परिसर सुशोभित करण्यात आला होता. मात्र, सध्या ट्रॅकवरील टर्फ तुटणे, जमिनीची पातळी खालावणे तसेच झाडांची निगा न राखल्याने परिसराची अवस्था वाईट झाली आहे. त्यामुळे नागरिकांच्या फिरण्यावर व व्यायामावर परिणाम होत आहे. अस्वच्छता आणि कचऱ्याचा साठा वाढल्याने आरोग्याचा धोका निर्माण झाला आहे. या जॉगिंग ट्रॅकच्या देखभालीसाठी कर्मचारी नसल्याने त्याचा गैरवापर आणि नुकसानीच्या घटना घडत आहेत. त्यामुळे महापालिकेने तातडीने ट्रॅकची दुरुस्ती करुन हरित क्षेत्राची देखभाल करावी आणि सुरक्षारक्षक नेमावा, अशी मागणी स्थानिक नागरिकांनी केली आहे.

रोज सकाळी इको जॉगिंग ट्रॅकवर फिरण्यासाठी येतो. नागरिकांची मोठ्या प्रमाणात गर्दी असते. मात्र ट्रॅक आणि रस्त्यावर मोठ्या संख्येने गवत आणि इतर झाडे वाढल्याने चालण्यास अडचण येत आहे. सापासारख्या सरपटणाऱ्या प्राण्यांचा धोका वाढतो आहे. महापालिकेने याबाबत त्वरित उपाययोजना करावी.
- राजेंद्र तरस, स्थानिक नागरिक