रावेत, ता. २७ ः भक्ती-शक्ती चौक ते मुक्काई चौक या बीआरटी मार्गावर प्रवाशांच्या सोयीसाठी बस थांब्याचे काम पूर्ण झाले आहे. तसेच, पादचारी मार्ग काम अंतिम टप्प्यात असून, लवकरच ते नागरिकांच्या वापरासाठी सुरू करण्यात येणार आहे.
या परिसरात प्रवाशांच्या सुरक्षेसाठी बस थांब्याजवळ सीसीटीव्ही कॅमेरे बसवण्यात आले आहेत. नवीन बस थांब्यांमुळे प्रवाशांना सुरक्षित आणि सोयीस्कर थांबा मिळणार आहे. पादचारी प्रवाशांसाठी रॅप वॉकमुळे बस स्टॉपपर्यंत पोहोचणे अधिक सोपे होईल. दिव्यांग प्रवाशांसाठी देखील सुविधा देण्यात आल्या आहेत.
सीसीटीव्ही कॅमेऱ्यांमुळे बस स्थानक परिसर अधिक सुरक्षित झाला आहे. बीआरटीमधून प्रवास करणाऱ्या प्रवाशांवर लक्ष ठेवण्यासाठी हे पाऊल उचलण्यात आले आहे, जेणेकरून गैरसोयीच्या किंवा अपघाताच्या घटना टाळता येतील. महापालिकेच्या अधिकाऱ्यांनी सांगितले की, रावेत परिसरात प्रवाशांची संख्या वाढत असल्याने बीआरटी थांब्याचे काम तातडीने पूर्ण करण्यात आले आहे. पादचारी मार्गाचे कामही लवकरच पूर्ण होऊन नागरिकांसाठी खुले करण्यात येणार आहे. स्थानिक रहिवासी संदीप जाधव म्हणाले, ‘‘पूर्वी बस पकडण्यासाठी योग्य जागा नव्हती. आता बस थांबा झाल्यामुळे आम्हाला खूप सोय झाली आहे.’’
प्रिया काळे म्हणाल्या, ‘‘बस स्थानकावर सीसीटीव्ही कॅमेरे बसविल्यामुळे विशेषतः महिलांना रात्री प्रवास करताना अधिक सुरक्षित वाटते.’’