निगडी, ता. ४ ः आपण जगत असलेल्या जीवनाचे सत्त्व हे मराठीतील कवितेमध्ये दडलेले असते. कविता ही वाचून अधिक चांगली समजते त्यातूनच कवितेची गोडी लागते, असे प्रतिपादन अभिनेत्री वर्षा उसगावकर यांनी निगडी येथे केले.
महाराष्ट्र साहित्य परिषद व मराठी भाषा संवर्धन समितीच्या वतीने पिंपरी चिंचवड वैभव या काव्यसंग्रहाचे प्रकाशन त्यांच्या हस्ते झाले. या प्रसंगी त्या बोलत होत्या. डॉ. श्रीपाद जोशी, अभय कुलकर्णी, अशोक पगारिया भाऊसाहेब भोईर आदी कवी उपस्थित होते.
प्रत्येक गावाचा एक इतिहास असतो. त्या स्थानाला विशिष्ट एक महत्त्व असते. या पुस्तकातून शहराचा स्थानिक इतिहास समोर आला आहे, असे मत डॉ. जोशी यांनी व्यक्त केले. यावेळी फिरोज मुजावर व ऋचा राजन यांनी गणेश वंदना सादर केली. राजन लाखे यांनी प्रास्ताविक केले. संभाजी बारणे यांनी आभार मानले. गणेश लिंगडे यांनी सूत्रसंचालन केले.