पिंपरी, ता. ३ ः ग. दि. माडगूळकर यांनी लिहिलेल्या व सुधीर फडके यांनी संगीतबद्ध केलेल्या गीतरामायणातील विविध रचना, या रचनांवर नृत्यांगणांनी केलेले भरतनाट्यमचे अप्रतिम सादरीकरण, नृत्यातून उलगडलेले रामायणातील विविध प्रसंग याचा अनुभव शहरातील रसिकांनी घेतला. निमित्त होते गदिमा व्यासपीठ आणि सौदामिनी प्रॉडक्शन्स यांच्या संयुक्त विद्यमाने आयोजित गीतरामायण भरतनाट्यम नृत्यानुभव या कार्यक्रमाचे. या वेळी आठ नृत्यांगनांनी रामायणातील विविध पात्रे भरतनाट्यम नृत्य शैलीच्या माध्यमातून जिवंत करीत केलेल्या सादरीकरणास रसिकांनी टाळ्यांची दाद दिली. निगडी प्राधिकरण येथील ग. दि. माडगूळकर नाट्यगृह येथे आयोजित केलेल्या गीतरामायण भरतनाट्यम् नृत्य यांचा अनोखा संगम रसिकांनी अनुभवला.
आनंद माडगूळकर, जितेंद्र पेठकर, कुमुदिनी पेठकर, अविनाश मोरे, अनुप मोरे, तेजस्विनी कदम, राजेश गाडगीळ, माजी नगरसेविका गीता आफळे, हर्षदा माडगूळकर, कल्पना बालाजी, अमिता गोडबोले, नृत्य दिग्दर्शिका सौदामिनी राव आदी उपस्थित होते. सूत्रसंचालन ज्योती ब्रह्मे यांनी केले.