जुनी सांगवी, ता. ७ ः जुनी सांगवी, दापोडीत सखल भागात ठिकठिकाणी पाणी तुंबण्याच्या प्रकारांमुळे रहिवाशांना त्रास सहन करावा लागत आहे. दापोडीत जयभीम नगर, गावठाण, आत्तार वीट भट्टी हा कष्टकरी रहिवाशांचा चाळी वस्तीचा परिसर आहे‌. परिसरात पावसाळापूर्व स्वच्छता व उपाययोजना झाल्या नसल्याचे चित्र आहे.
जुनी सांगवी येथील ममतानगर, मुख्य रस्ता वास्तुशांती रेसेडन्सी येथे पाण्याचा निचरा होत नसल्याने नागरिकांना कसरत करत घर गाठावे लागत आहे. अंतर्गत गल्ल्यांमधून हीच परिस्थिती असल्याने मुख्य रस्त्यासह नागरिकांना गल्ल्यांमधून तुंबणाऱ्या पाण्याचा त्रास सहन करावा लागत आहे. स्थापत्य विभाग, आरोग्य विभाग, जल निस्सारण विभागाकडून संयुक्त दुरुस्ती कामे सुरू असल्याचे सांगण्यात आले.

‘‘दापोडी परिसरात जयभीम नगर, आत्तार वीट भट्टी परिसरात नेहमी पाणी तुंबते. त्यामुळे रहिवाशांच्या घरात पाणी येत असल्याने अनेक अडचणींना सामोरे जावे लागत आहे. कायमस्वरूपी उपाययोजना करण्यात यावी, याबाबत आम्ही वारंवार मागणी केलेली आहे.’’
-प्रकाश गोयर, रहिवासी.

‘‘गेल्या अनेक वर्षांपासून येथील रहिवाशांना पावसाळ्यात पाणी तुंबण्याच्या प्रकाराला सामोरे जावे लागत आहे.
-अशोक अडसूळ, सतीश पटेकर, रहिवासी.

‘‘येथील परिस्थितीबाबत कार्यवाही सुरू आहे. दुरुस्ती कामे व उपाययोजना करण्यात येतील.
-यशवंत डांगे, मुख्य आरोग्य अधिकारी, महापालिका.

‘‘सांगवी भागात पाणी तुंबणाऱ्या ठिकाणांची पाहणी करून दुरुस्ती व उपाययोजना करण्यात येत आहेत.
-प्रकाश कोटकर, अभियंता, स्थापत्य विभाग, ह प्रभाग

फोटो ः 18022, 18023