पिंपरी, ता. ४ : राज्य शासनाच्या धोरणानुसार आता मोहननगर, चिंचवड येथील राज्य कामगार विमा रुग्णालयात (ईएसआय) महात्मा फुले जनआरोग्य योजनेची अंमलबजावणी होणार आहे. या योजनेतील पात्र रुग्णांवर उपचार केले जाणार आहेत. या अगोदर फक्त ईएसआय कामगारांवर उपचार करण्यात येत होते. आता महात्मा ज्योतिबा फुले जनआरोग्य योजनाच्या माध्यमातून इतर रुग्णांवरही उपचार करण्यासाठी रुग्णालय प्रशासन सज्ज झाले आहे. त्यामुळे रुग्णालय परिसरातील नागरिकांना ते सोयीचे ठरणार आहे. योजनेतील पात्र लाभार्थ्यांनी अधिक माहितीसाठी चिंचवड येथील ईएसआय रुग्णालयात संपर्क साधण्याचे आवाहन प्रशासनाने केले आहे.
जागतिक आरोग्य दिनानिमित्त महाराष्ट्रातील बारा राज्य कामगार विमा रुग्णालय (ईएसआय) येथे महात्मा ज्योतिबा फुले जनआरोग्य योजना लागू करण्यात येणार आहे. त्याचे उद्‍घाटन मुख्यमंत्री देवेंद्र फडणवीस आणि आरोग्यमंत्री प्रकाश आबिटकर यांच्या हस्ते सोमवारी (ता. ७) ऑनलाइन पद्धतीने होणार आहे. त्यादृष्टीने मोहननगर, पिंपरी चिंचवड येथे असणाऱ्या ईएसआय रुग्णालयामध्ये पूर्ण तयारी करण्यात आली आहे. या विमा संरक्षणमध्ये प्रति कुटुंब वार्षिक दीड लाख रुपये पर्यंतचे आरोग्य विमा संरक्षण प्रदान केले जाते. या योजनेत ३४ विशेषतांमध्ये १ हजार ३५६ आरोग्य लाभ समाविष्ट आहेत. ज्यामध्ये विविध शस्त्रक्रिया, थेरपी आणि उपचारांचा समावेश आहे. फॉलोअप उपचारामध्ये २६२ फॉलोअप उपचार सुविधा उपलब्ध आहेत.

‘‘मोहननगर येथील ईएसआय रुग्णालयात फक्त कामगारांसह त्यांच्या कुटुंबावर उपचार केले जात होते. आता राज्यातील १२ ईएसआय रुग्णालयात महात्मा ज्योतिबा फुले जनआरोग्य योजना सुरू होणार आहे. या रुग्णालयात कामगारांशिवाय इतर रुग्णांवरही उपचार करण्यात येणार आहेत. तरी या योजनेत पात्र असणाऱ्यांनी सोमवारी (ता. ७) मोहननगर येथील ईएसआय रुग्णालयात उपस्थित राहावे.
- डॉ. वर्षा सुपे, वैद्यकीय अधिक्षक, कामगार रुग्णालय, मोहननगर चिंचवड
---