जुनी सांगवी, ता.२७ ः पावसामुळे वाहून आलेल्या जलपर्णीमुळे जुनी सांगवी परिसरातील मुळा नदीपात्र पिंपळे निलख हद्दीपासून दापोडीपर्यंत भरले आहे. त्याने नदीपात्र जणू हिरव्यागार शेतीसारखे भासू लागले आहे. मात्र त्याने जुनी सांगवी, दापोडी आणि पिंपळे निलख परिसराला डासांचा उपद्रवाला सामोरे जावे लागणार आहे.
वर्षभर जलपर्णी काढण्याचे काम केले जात असल्याचा दावा महापालिकेकडून केला जातो. मात्र, जलपर्णी काढण्याच्या नावाखाली ठेकेदार पोसण्याचे काम होत असल्याचा आरोप सांगवीकर करत आहेत. सध्या मुळा नदीपात्रात मोठ्या प्रमाणावर जलपर्णी दिसून येत आहे. त्यामुळे एवढ्या मोठ्या प्रमाणात जलपर्णी आली कुठून ? पावसाळ्यात जलपर्णी पात्राबाहेर काढण्यात येणार का ? की मोठ्या पावसाने जलपर्णी पुढे वाहून जाण्याची महापालिकेचा पर्यावरण विभाग वाट पाहात बसणार ? असे प्रश्न नागरिकांमधून विचारले जात आहेत.
मधुबन सोसायटी, शितोळेनगर, ढोरेनगर, मुळानगर, अभिनवनगर, जयमालानगर, पवनानगर, संगमनगर, ममतानगर या नदीकाठच्या रहिवासी भागांसह समस्त जुनी सांगवी, दापोडीकरांना हा नेहमीचा त्रास आहे. जुनी सांगवी ते दापोडीचा हॅरिस पूल परिसरात साधारण चार ते किलोमीटरपर्यंत नदीपात्र जलपर्णीमुळे व्यापले आहे.

जलपर्णी साचून राहिल्यास जुनी सांगवीकरांना डास व किटकांच्या उपद्रवाला सामोरे जावे लागणार आहे. सध्या कोरोनासारखा आजार डोके वर काढत असताना त्यात डासांमुळे होणारे आजार उद्भवू शकतात. त्याची दखल घेऊन पर्यावरण विभागाने याकडे लक्ष द्यावे.
- रुपेश पुजारी, नागरिक

पुणे महापालिका व पर्यावरण विभाग संयुक्तपणे उपाययोजना करून कार्यवाही करेल. वर्षभर नदीपात्र स्वच्छ ठेवण्याचे काम सुरू होते. पावसामुळे पाण्याच्या प्रवाहाबरोबर जलपर्णी वाहून आली आहे. योग्य उपाययोजना करण्यात येतील.
- संजय कुलकर्णी, अभियंता, पर्यावरण विभाग