पिंपरी, ता. १२ ः राज्य शासनाने धर्मवीर आनंद दिघे साहेब महाराष्ट्र ऑटो रिक्षा आणि मीटर्ड टॅक्सी चालक कल्याणकारी मंडळाची स्थापना केली आहे. या मंडळामार्फत ऑटो रिक्षा आणि मीटर्ड टॅक्सी चालकांना विविध कल्याणकारी योजनांचा लाभ उपलब्ध करून देण्यात येणार असून संबंधितांनी या योजनांचा लाभ घेण्याचे आवाहन पिंपरी-चिंचवड प्रादेशिक परिवहन कार्यालयाने केले आहे.
पिंपरी-चिंचवड शहरासह राज्यातील अनेक ऑटो रिक्षा संघटनांच्यावतीने काही वर्षांपासून कल्याणकारी मंडळ स्थापन करण्याची मागणी होत होती. गेल्यावर्षी १६ मार्चच्या शासन निर्णयानुसार मंडळाची स्थापना करण्याचा निर्णय घेतला होता. यामुळे परवानाधारक ऑटोरिक्षा चालकांसाठी सामाजिक सुरक्षा आणि कल्याणकारी योजना राबविणे व केंद्र आणि राज्याच्या कल्याणकारी योजनांचा लाभ रिक्षाचालक आणि मालकांना मिळणार आहे. चालकांनी योजनांच्या लाभासाठी ऑनलाइन अर्ज करणे आवश्यक आहे. तसेच अधिक माहितीसाठी प्रादेशिक परिवहन कार्यालय येथे संपर्क साधावा, असे आवाहन उपप्रादेशिक परिवहन अधिकारी राहुल जाधव यांनी केले आहे.

कल्याणकारी मंडळाचा लाभ
- ६५ वर्षांवरील चालकांसाठी सन्मान निधी योजना
- जीवन विमा व अपंगत्व विमा योजना कर्तव्यावर असताना
- आरोग्यविषयक लाभ योजना
- कामगार कौशल्यवृद्धी योजना
- कर्तव्यावर असताना दुखापत झाल्यास अर्थसाहाय्य योजना
- पाल्यांच्या शिक्षणासाठी शिष्यवृत्ती

कुठे करणार नोंदणी
वाहन चालकांनी कल्याणकारी मंडळाचे सभासद होणेसाठी https://ananddighekalyankarimandal.org/home/register या संकेतस्थळावर नोंदणी शुल्क भरून अर्ज करणे आवश्यक आहे. यासाठी नोंदणी व ओळखपत्र शुल्क ५०० रुपये व वार्षिक सभासद शुल्क ३०० रुपये आकारण्यात येत आहे.

सभासदस्यत्वासाठी आवश्यक
मंडळाच्या सभासदत्वासाठी अर्जदाराकडे राज्यामध्ये नोंदणी असलेल्या ऑटो रिक्षा, मीटर्ड टॅक्सी अनुज्ञप्ती व बॅच असणे बंधनकारक राहील. नोंदणीकृत चालकांना मंडळाच्या जिल्हास्तरीय कार्यालयाकडून ओळखपत्र देण्यात येणार आहेत.
---