जुनी सांगवी, ता. २२ ः फुगेवाडी परिसरातील नागरिकांसाठी आरोग्यसेवेचा मुख्य आधार असलेला पिंपरी-चिंचवड महापालिकेचा दवाखाना दुरवस्थेच्या गर्तेत सापडला आहे. जागा अत्यंत अपुरी असल्याने डॉक्टर, आरोग्य कर्मचारी तसेच रुग्णांना अनेक अडचणींना सामोरे जावे लागते.
दवाखान्यात केवळ दोनच खोल्या आहेत. त्यात डॉक्टरांकडून तपासणी खोली, औषध वितरण, लसीकरण तसेच प्राथमिक उपचार अशी सर्व कामे होतात. रुग्णांची गर्दी झाल्यावर व्यवस्थापन विस्कळित होते. प्रतीक्षा कक्षासाठी जागा नसल्यामुळे रुग्णांना बाहेर रांगेत थांबावे लागते. मुख्य म्हणजे दवाखाना पहिल्या मजल्यावर असल्याने ज्येष्ठ नागरिक, गरोदर माता यांना त्रास सहन करावा लागतो.
वास्तविक फुगेवाडीची लोकसंख्या सुमारे दहा हजारच्या घरात आहे. जागा अपुरी असूनही डॉक्टर दवाखान्यात नियमित असतात. रुग्णांची तपासणी नियमित होते. औषधे दिली जातात. सुरक्षा व्यवस्था सुद्धा पुरेशी आहे. ह्या सगळ्या जमेच्या बाजू असताना दवाखान्यासाठी मोठ्या जागेची गरज असल्याची नागरिकांची मागणी आहे.
फुगेवाडीची लोकसंख्या सुमारे दहा लाखाच्या घरात आहे. त्या तुलनेत जागा अपुरी पडते, असे स्थानिक नागरिक प्रा. मनोज वाखारे यांनी सांगितले.
---

दवाखाना पहिल्या मजल्यावर असल्याने ज्येष्ठ नागरिक, गरोदर माता यांना त्रास होतो. गर्दीमुळे गरोदर मातांना नीट बसता येत नाही. त्यांच्यासाठी हिरकणी कक्षही उपलब्ध नाही.
- दीपक शिंदे
---

१) दवाखान्यात स्वच्छता : आहे
२) बाह्यरुग्ण विभागात डॉक्टर : होते
३) रुग्णांची व्यवस्थित तपासणी ; होते
४) औषधे : दिली जातात
५) सुरक्षा व्यवस्था : आहे