जुनी सांगवी, ता.२५ : महानगरपालिकेच्या सांगवी रुग्णालयातर्फे राष्ट्रीय कीटकजन्य आजार नियंत्रण कार्यक्रमांतर्गत डेंगी, हिवताप, चिकनगुनिया आदी आजारांबाबत जनजागृती सुरू आहे. याअंतर्गत ‘ब्रेक द चेन’ ही व्यापक मोहीम राबविण्यात येत आहे.
ही मोहीम जुनी सांगवी, नवी सांगवी, पिंपळे गुरव, कासारवाडी, फुगेवाडी, दापोडी या भागात सुरू आहे. ज्येष्ठ वैद्यकीय अधिकारी डॉ. तृप्ती सागळे, नोडल अधिकारी डॉ. वैशाली भामरे यांच्या नेतृत्वाखाली मोहिम राबविली जात आहे. यामध्ये प्रामुख्याने डासांची उत्पत्ती टाळण्यासाठी विशेष सर्वेक्षण, प्लास्टिक डबे, टायर, कुंड्या, पाण्याचे टाकी, फूटपाथवरील खड्डे व इतर साचलेले पाणी अशी सर्व ठिकाणे तपासून नष्ट केली जात आहेत. बाधित व्यक्ती आढळल्यास त्यांच्या घरी भेट देऊन प्राथमिक माहिती संकलित केली जाते. संपर्कातील व्यक्तींमध्ये लक्षणे आढळल्यास रक्त नमुने गोळा केले जातात. कोरडा दिवस पाळणे, त्वरित वैद्यकीय उपचार घेणे याबाबत माहिती दिली आहे.
या उपक्रमात ज्येष्ठ कर्मचारी गणेश जवळकर यांच्या नेतृत्वाखाली प्रतीक राऊत, हृषिकेश मालसमिनदार आदी कर्मचारी पथक कर्तव्य बजावत आहेत.

‘ब्रेक द चेन’ ही मोहीम जूनपासून सुरू आहे. ती आता व्यापकपणे राबविण्यात येत आहे. नागरिकांनी महापालिकेला सहकार्य करावे. आरोग्याबाबत सजगता बाळगावी.
- डॉ.तृप्ती सांगळे, वैद्यकीय अधिकारी, सांगवी रुग्णालय.