जुनी सांगवी, ता. २९ : शाळकरी विद्यार्थ्यांनी सीमेवरील जवानांसाठी तयार केलेल्या दोन हजार राख्या नुकत्याचा पाठविण्यात आल्या. कारगिल विजय दिनी १५ मराठा लाइफ इन्फन्ट्रीच्या अधिकाऱ्यांकडे या राख्या सुपुर्द करण्यात आल्या. औंध कॅम्पचे सुभेदार किरण लोंढे यांनी या राख्यांचा स्वीकार केला.
छत्रपती शिवाजी शिक्षण प्रसारक मंडळाचे कै.सौ. शकुंतलाबाई आनंदराव शितोळे प्राथमिक विद्यामंदिर, शिशुविहार व नूतन माध्यमिक विद्यालय, सांगवी यांच्यावतीने हा उपक्रम राबविण्यात आला. कार्यक्रमाच्या अध्यक्षस्थानी संस्थेचे सचिव तुळशीराम नवले हे होते. यावेळी सुभेदार किरण लोंढे यांनी विद्यार्थ्यांना मार्गदर्शन केले.
या कार्यक्रम प्रसंगी हवालदार तुषार जगताप, सेना मेडल विजेते शिवाजी भुसारे, शिपाई साळुंखे, शाळेचे खजिनदार रामभाऊ खोडदे, सदस्य प्रकाश ढोरे, जयप्रकाश जंगले यांच्यासह शिक्षक, पालक, विद्यार्थी उपस्थित होते. कार्यक्रमाचे प्रास्ताविक व शाळेचे मुख्याध्यापक शिवाजी माने यांनी केले. सूत्रसंचालन दत्तात्रय जगताप यांनी केले.