पिंपरी, ता. २१ : हिंसक जमावाला नियंत्रणात आणण्यासाठी काय उपाययोजना करता येतील, यासाठी पिंपरी चिंचवड पोलिसांनी गुरुवारी (ता. २१) सकाळी वाकड येथील पोलिस वसाहतीच्या मोकळ्या मैदानात जमावबंदी हाताळण्याचा सराव केला. या सरावात गोळीबार, हातगोळे फेकणे, अश्रुधुराच्या नळकांड्यांची चाचणी अशा उपाय योजना प्रत्यक्ष करून पाहण्यात आल्या.
एखाद्या वेळी अचानक गर्दीला हिंसक वळण लागते. त्यावेळी हिंसक जमावाला नियंत्रित करणे व त्याला पांगवण्यासाठी नेमके कोणते पाऊल उचलले जावे, याचे सरावादरम्यान प्रात्यक्षिक दाखवण्यात आले. हवेत गोळीबार करून जमाव मागे हटविणे, अश्रुधूर नळकांड्या फोडून परिसर रिकामा करणे तसेच हातगोळ्यांचा वापर करून जमाव पांगविण्याचा सराव यावेळी करण्यात आला.

गणेशोत्सव आणि मोर्चे-आंदोलनांच्या पार्श्वभूमीवर पोलिसांनी सतर्क राहणे आवश्यक आहे. जमावबंदीच्या प्रसंगी पोलिसांनी कोणते तांत्रिक व कायदेशीर उपाय करावेत, याचा हा सराव आहे.
- सुनील कुराडे, सहायक पोलिस आयुक्त, पिंपरी चिंचवड