पिंपरी, ता. ३ : राज्य शासनाचे सांस्कृतिक कार्य संचालनालय आयोजित ६४ व्या हौशी मराठी राज्य नाटय स्पर्धेला चिंचवडमधील प्रा. रामकृष्ण मोरे प्रेक्षागृहात प्रारंभ झाला. अखिल भारतीय नाट्य परिषदेच्या मध्यवर्ती शाखेचे उपाध्यक्ष भाऊसाहेब भोईर यांच्या हस्ते उद्‍घाटन झाले. २७ नोव्हेंबरपर्यंत स्पर्धेचे आयोजन करण्यात आले आहे. पिंपरी चिंचवड केंद्रावर होणाऱ्या प्राथमिक फेरीत २६ संघांनी सहभाग घेतला आहे. यात १५ संघ पिंपरी चिंचवड शहरातील आहेत. उद्‍घाटनप्रसंगी सुहास जोशी, गौरी लोंढे, नरेंद्र आमले, राज आहेरराव, सहाय्यक लेखा अधिकारी नरेंद्र तायडे, परिक्षक राजेश जाधव, संगीता परदेशी, राम चव्हाण आदी उपस्थित होते. भोईर म्हणाले, ‘‘पिंपरी चिंचवड हे आधी स्पर्धेचे केंद्र नव्हते. प्रा. रामकृष्ण मोरे सांस्कृतिक मंत्री झाले तेव्हा पिंपरी चिंचवडला केंद्र मिळाले. स्पर्धेच्या माध्यमातून विविध नाट्य प्रयोगांचा आस्वाद घेता येईल. सर्व नाटकांना जास्तीत जास्त प्रेक्षकांनी उपस्थित राहावे आणि हौशी रंगकर्मींचा उत्साह वाढवावा.’’
-----