जुनी सांगवी, ता.२० ः पिंपळे निलख भुयारी मार्ग व उड्डाणपुलाचे काम सुरू असल्याने पिंपळे निलख गाव ते रक्षक चौकात जाण्यासाठी पर्यायी रस्ता करण्यात आलेला आहे. मात्र, पावसाळ्यात या रस्त्याची खड्ड्यांमुळे दुरवस्था झाली होती. यामुळे नागरिकांना कसरत करावी लागत होती. खड्डेमय रस्ता, उखडलेली खडी, धुळीचे लोट आणि सायंकाळी वाढणारा अपघाताचा धोका यामुळे नागरिक त्रस्त झाले होते. स्थानिक रहिवासी, व्यावसायिक व विद्यार्थी वर्गाने अनेक वेळा मागणी करूनही दुरुस्तीची कामे पुढे सरकत नव्हती. याबाबत ‘सकाळ’ मधून बातमी प्रसिद्ध करण्यात आली होती. याची दखल घेत पर्यायी रस्त्याचे डांबरीकरण करण्यात आले आहे. त्यामुळे येथील रहदारी सुकर होण्यास मदत झाली.

‘सकाळ’च्या बातमीमुळे प्रशासनाने तत्काळ प्रतिसाद देत कामाला गती दिली. मागील काही महिन्यांपासून खड्डेमय रस्त्यामुळे त्रास सहन करावा लागत होता.
-माणिक भांडे, नागरिक

पर्यायी रस्त्याचे डांबरीकरण करण्यात आले आहे. याचबरोबर अंतर्गत रस्त्यावरील खड्ड्यांची दुरुस्ती करण्यात येईल.
-अविनाश चव्हाण, कनिष्ठ अभियंता स्थापत्य पिंपळे निलख