मतमोजणी केंद्रांवर ढिसाळ नियोजन
- पाणी नाही, जेवणासाठीही आबाळ

पिंपरी, ता. १६ : महापालिकेची निवडणूक झाल्याने पिंपरी चिंचवडला चार वर्षानंतर नवे कारभारी मिळाले. त्यामुळे निकाल काय येणार,. याची उत्सुकता कार्यकर्ते, उमेदवार आणि सामान्य नागरिकांनाही होती. मात्र, निवडणूक निर्णय अधिकारी आणि पिंपरी चिंचवड महापालिकेच्या ढिसाळ नियोजनामुळे शहरातील निकाल सर्वांत उशिराने जाहीर झाले. जेव्हा पुण्यातील विजयी उमेदवारांची नावे जाहीर केली जात होती. तेव्हा पिंपरी चिंचवडमध्ये मात्र पहिल्या काही फेऱ्यांचे निकाल हाती येत होते.
‘अ’ क्षेत्रीय कार्यालयांतर्गत येणाऱ्या प्रभाग क्रमांक १०, १४,१५,१९ ची मतमोजणी प्राधिकरणातील हेडगेवार भवन येथे पार पडली. मात्र, या ठिकाणी मतमोजणीसाठी आलेले उमेदवारांचे प्रतिनिधी, माध्यम प्रतिनिधी, पोलिस कर्मचारी यांच्यासाठी दुपारी पिण्याच्या पाण्याचीदेखील सोय नव्हती. दुपारचे जेवणही उशिराने आणि अपुरे मिळाले. त्यामुळे उमेदवार प्रतिनिधी, पोलिस कर्मचारी आणि कार्यकर्त्यांनी परिसरातील खाद्यपदार्थांच्या स्टॉलवर मोठी गर्दी केली होती. आलेले जेवण अपुरे आणल्याने मतमोजणी केंद्राबाहेर असणाऱ्या पोलिस कर्मचाऱ्यांपर्यंत पोचलेच नाही.