पिंपरी, ता. २० : काळेवाडी येथे स्वामी विवेकानंद तसेच राजमाता जिजाऊ जयंतीनिमित्त स्वामी विवेकानंद विचारमंच द्वारा विशेष कार्यक्रम पार पडले. युवा उद्योजक राजेश अगरवाल कार्यक्रमाच्या अध्यक्षस्थानी होते.
‘आपल्या देशात थोर महापुरुषांच्या जयंती व पुण्यतिथीला पुष्पहार अर्पण, मिरवणुका, जलसे, घोषणाबाजी यांमधून श्रद्धा व्यक्त केली जाते; मात्र या सर्व बाह्य साजरी करण्यापेक्षा महापुरुषांचे विचार, मूल्यव्यवस्था आणि जीवनदृष्टी आचरणात उतरवणे अधिक महत्त्वाचे आहे. महापुरुषांचे विचार आत्मसात करून त्याच मार्गाने सातत्याने वाटचाल करणे हेच त्यांच्या पूजनाचे खरे आणि शाश्वत स्वरूप आहे, असे प्रतिपादन वक्ते आणि विचारवंत सिद्धनाथ घायवट जोशी यांनी केले.
कार्यक्रमाचे नियोजन संदीप जाधव, मयूर पाटील, रविकिरण देशमुख, संदीप पाटील, दीपक पांडे, श्रीराम भालेकर आदींनी केले. या प्रसंगी थेरगाव, वाकड, रहाटणी फाटा, काळेवाडी फाटा परिसरातील आबालवृद्ध नागरिक उपस्थित होते.