पिंपरी, ता. ५ : पुणे महानगर परिवहन महामंडळाच्या (पीएमपी) बसने दुचाकीला धडक दिली. यात दुचाकीवरील ज्येष्ठ महिलेचा मृत्यू झाला. तर, त्यांचे पती जखमी झाले. देहूतील बीजसोहळा करुन पती सोबत दुचाकीवरून घरी जात असतानाच विठ्ठलवाडी येथील रिंगरोड येथे गुरुवारी (दि.५) दुपारी अडीचच्या सुमारास ही घटना घडली.
भागीरथी विभुते (वय ६७, रा. पाटीलनगर, चिखली) असे या अपघातात मृत्यू झालेल्या महिलेचे नाव आहे. तर त्यांचे पती त्र्यंबक विभुते हे जखमी झाले आहेत. भागीरथी विभुते या देहू येथे संत तुकाराम महाराज बीज सोहळ्यानिमित्त दर्शन घेऊन पतीसोबत दुचाकीवरून घरी जात होत्या. गाथा मंदिराकडून काळोखे चौकाकडे जाणाऱ्या बायपास रिंगरोडने जाताना त्यांच्या दुचाकीला पीएमपी बसची मागून धडक बसली. या अपघातात भागीरथी बसच्या चाकाखाली सापडल्या.