पिंपरी, ता. ३ : निगडी-तळवडे मार्गावरील त्रिवेणीनगर चौक हा परिसरातील प्रमुख वाहतूक दुवा मानला जातो. औद्योगिक वसाहती, निवासी भाग तसेच मुख्य मार्गांना जोडणारा हा चौक दिवसेंदिवस अधिकच गजबजलेला होत आहे. या चौकाचे रुंदीकरण झाले, रस्ते प्रशस्त झाले. मात्र, अद्यापही या चौकातून वळण घेण्यासाठी दूरवरून वळसा मारावा लागत असून, काही सिग्नलही बंद आहेत. यामुळे वाहनचालकांना मनस्ताप सहन करावा लागत असून, या चौकाची सध्याची स्थिती ‘असून अडचण, नसून खोळंबा’ अशी झाली आहे.
निगडीकडून येताना तळवडेकडे जाण्यासाठी त्रिवेणीनगर येथे उजवीकडे वळण घ्यावे लागते. यासाठी त्रिवेणीनगर चौकात आयलँडही उभारले आहेत. मात्र, येथे वाहतूक कोंडी होत असल्याचे सांगत आयलँडच्या ठिकाणी पाइप टाकून येथील हा मार्ग बंद ठेवला आहे. त्यामुळे वाहनचालकांना आझाद चौकमार्गे वळसा घेऊन यावे लागत आहे.
तसेच तळवडेकडून निगडीकडे जाताना त्रिवेणीनगर चौकातील सिंगल यंत्रणा बंद आहे. त्यामुळे कशाही पद्धतीने वाहने दामटली जातात. वाहनचालकांना कोणतेही संकेत न मिळाल्याने ‘पहिले येईल तो जाईल’ अशा पद्धतीने वाहतूक सुरू आहे. यामुळे पादचाऱ्यांना रस्ता ओलांडणेही धोकादायक ठरत आहे.

‘‘येथील रस्त्याचे रुंदीकरण झाले. मात्र, काही कामे पूर्ण असल्याने वाहने कशाही पद्धतीने धावत असतात. यामुळे अपघाताचा धोका निर्माण होतो. तरी प्रशासनाने योग्य त्या उपाययोजना राबवणे आवश्यक आहे.
- ज्ञानेश्वर बहिरे, वाहनचालक, निगडी

‘‘निगडीकडून येताना तळवडेकडे जाण्यासाठी वळण घेताना वाहतूक कोंडी होण्याची शक्यता असते. त्यामुळे सध्या पुढे काही अंतरावर वाहने वळवली जात आहेत. लवकरच त्याठिकाणी योग्य नियोजन केले जाणार आहे.
- अभिमान भोसले, कार्यकारी अभियंता, महापालिका
---