पिंपळे गुरव, ता. ३० ः पिंपळे गुरव येथील सुयोग कॉलनीत ओमसाई फाउंडेशन व सुयोग कॉलनी महिला मंडळ यांच्या संयुक्त विद्यमाने मंगळागौरीच्या खेळातून सामाजिक संदेश देण्यात आला. मंगळागौर, अन्नपूर्णा गणपती, कलश, घंटा, दीप यांचे पूजन करून शिव मंगळागौरीचे आवाहन करण्यात आले. पारंपारिक खेळ खेळून कार्यक्रमाची सुरुवात करण्यात आली. खेळामध्ये फुगडी, चौफुला फुगडी, जाते फुगडी, सुपली फुगडी असे फुगडीच्या विविध प्रकारात खेळ रंगला होता.
स्मार्ट सिटीच्या परिसरात आपली महाराष्ट्राची परंपरा जपण्याचा प्रयत्न करण्यात आला आहे. या प्रयत्नांना परिसरातील आदी महिलांनी उत्स्फूर्त प्रतिसाद दिला. बदलापूर आणि कोलकत्ता येथे मुलींवर झालेल्या घटनेचा यावेळी निषेध करण्यात आला. नाट्य रूपातून नृत्य सादरीकरण करून उपस्थितांची टाळ्यांच्या गजरात महिलांनी दाद मिळविली. यावेळी अभिनेते व सहाय्यक दिग्दर्शक संदेश सूर्यवंशी यांच्या हस्ते सहभागी महिलांना सन्मान चिन्ह देऊन गौरविण्यात आले. यावेळी अध्यक्ष प्रीती मराठे, अवनी शिंदे, उज्वला पाटील, शालिनी यादव, शिल्पा राऊत, ज्योती आव्हाड, सीमा कांबळे, नयन शिंदे, आशा आव्हाड, ज्योती शिंगाडे, राणी टोपले, निलम कुलकर्णी उपस्थित होते. काव्या शिंदे यांनी सूत्रसंचालन केले. प्रीती मराठे यांनी आभार मानले.