पिंपळे गुरव, ता. २३ ः पिंपळे गुरव परिसरातील मोरया पार्क गल्ली क्रमांक २ मध्ये घरांमध्ये चक्क मैलामिश्रित सांडपाणी शिरल्याने नागरिक हैराण झाले आहेत. साठ फुटी रस्त्यालगत असलेल्या या गल्लीत सांडपाणी वाहिनी तुंबल्यामुळे संपूर्ण घरांमध्ये सांडपाणी साचून प्रचंड दुर्गंधी पसरली आहे. स्वयंपाकघर, बेडरूम आणि बाथरूममध्ये हे पाणी शिरल्याने घरात राहणेही कठीण झाले असून अनेकांना श्वास घेणेही कठीण झाले आहे.
महानगरपालिकेने पावसाळ्यापूर्वी सांडपाणी वाहिन्या स्वच्छ केल्‍याचा दावा केला आहे. मात्र प्रत्यक्षात ही कामे झालीच नसल्याचे या घटनेवरून स्पष्ट झाले आहे. नागरिकांनी याआधीही या भागातील गटार तुंबते, असा मुद्दा वेळोवेळी उपस्थित केला होता. मात्र, प्रशासनाने केवळ तात्पुरते उपाय करून वेळ मारून नेली. या अक्षम्य दुर्लक्षामुळे यंदा परिस्थिती अधिकच बिकट झाली आहे.
दरवर्षी हा प्रश्न उपस्थित होतो. मात्र, अजूनही त्यावर कायमस्वरूपी उपाय करण्यात आलेला नाही. महापालिकेकडून केवळ पाणी तात्पुरते बाहेर काढले जाते. पण, संपूर्ण सांडपाणी वाहिनीचे पुनर्वसन किंवा स्वच्छता होत नाही. त्यामुळे, ही समस्या पुन्हा पुन्हा डोके वर काढते. या प्रकाराची गंभीर दखल घेऊन संबंधित अधिकाऱ्यांवर कारवाई करावी, आर्थिक नुकसान भरून द्यावे आणि सांडपाणी वाहिनीचे संपूर्ण पुनर्विकास करावा, अशी मागणी केली आहे. या प्रकाराने महापालिकेच्या कामकाजावर प्रश्नचिन्ह उपस्थित झाले असून आता प्रशासनाने केवळ आश्वासन न देता ठोस कृती करावी, अशी अपेक्षा व्यक्त केली जात आहे.

आर्थिक नुकसान, आजारांचाही धोका
या सांडपाण्यामुळे घरातील फर्निचर, कपडे, भिंतींचे रंग खराब झाले असून नागरिकांचे आर्थिक नुकसानही मोठ्या प्रमाणात झाले आहे. पाणी शिरल्यामुळे घरातील लहान मुलांना त्वचाविकार, सर्दी-खोकला आणि मळमळ यासारखे त्रास जाणवू लागले आहेत. ज्येष्ठ नागरिकही या दुर्गंधीमुळे त्रस्त झाले आहेत.

महापालिकेचे कर्मचारी पाहणीस येतात. फोटो घेतात. पण, प्रत्यक्षात काहीही काम होत नाही. यंदाही तसेच झाले. नागरिकांच्या आरोग्याशी खेळ करत केवळ कागदोपत्री कारभार केला गेला आहे.
- कैलास बनसोडे, स्थानिक नागरिक

मोरया पार्क गल्ली २ मधील सांडपाणी वाहिनी तुंबल्याने आमच्या घरामध्ये दुर्गंधीयुक्ती पाणी पसरले आहे. अगदी स्वयंपाक घरामध्येही ते सांडपाणी घुसल्याने आमच्या आरोग्याचा गंभीर प्रश्न निर्माण झाला आहे. घरात राहणे कठीण झाले आहे. महानगरपालिकेने तातडीने कायमस्वरूपी प्रश्न सोडवावा.
- हेमंत अडसुळे, स्थानिक नागरिक

सांडपाणी वाहिनीमध्ये नागरिकांकडून अनावश्यक कचरा टाकला जात असावा. त्यामुळे ती तुंबत आहे. तसेच गल्ली क्र.१ मधील सांडपाणी वाहिनीशी ही वाहिनी जोडण्याचा प्रयत्न चालू आहे. मात्र संबंधित शेजारील क्षेत्रातून पुढे वाहिनी टाकण्यात अडचण आहे. मात्र योग्य मार्ग काढून लवकरच समस्या सोडवली जाईल.
- अमित दीक्षित, उपअभियंता, ‘ड’ क्षेत्रीय कार्यालय

सांडपाणी वाहिनीच्या दुरुस्तीचे काम चालू असून लवकरच तेथील समस्या सोडवली जाईल. समस्या सोडवण्यासाठी योग्य पद्धतीने पाठपुरावा चालू आहे.
- अमित पंडित, ‘ड’ क्षेत्रीय अधिकारी, पिंपरी चिंचवड महानगरपालिका