पिंपळे सौदागर, ता. ९ ः रहाटणीमधील शिवराज नगर येथील श्री स्वामी समर्थ अनंत मठ, मुख्य शक्तीपीठ, जागृत हिंदू देवस्थान येथे गुरुपौर्णिमेच्या पवित्र पर्वानिमित्त श्री गुरुचरित्र पारायण सोहळा मोठ्या भक्तिभावाने व शिस्तबद्ध वातावरणात पार पडला.
जवळपास पाच दिवस पारायणाचा कार्यक्रम चालला. त्यामध्ये दररोज सकाळी नियमितरित्या गुरुचरित्र पारायण, दुपारी प्रवचन, हरिपाठ व संध्याकाळी आरती-भजन आदी धार्मिक कार्यक्रमांचे आयोजन करण्यात आले. या पारायण सोहळ्याचे आयोजन सद्‍गुरु अनंत पोतदार महाराज यांच्या पाचही अनंत मठांचे सर्वेसर्वा तसेच मुख्य संयोजक गुरुमाउली सुनीता अनंत पोतदार (काकी) यांच्या मार्गदर्शनाने पार पडले. पारायणाच्या निमित्ताने श्री स्वामी समर्थ अनंत मठ येथे दिवसभर भक्तांचे आगमन सुरू होते. पारायणानंतर दररोज सर्व भक्तांसाठी महाप्रसाद वितरित करण्यात आला. महाप्रसादाची व्यवस्था अत्यंत शिस्तबद्ध व भाविकांच्या सेवेसाठी समर्पित सेवा संघ करत होता.
पारायण काळात मठात स्वच्छता, शिस्त, नियोजन आणि भक्तांचे स्वागत करण्याची विशेष काळजी घेतली गेली. परिसरातील नागरिक व विविध भागांतील स्वामी भक्त मोठ्या संख्येने सहभागी झाले.