पिंपळे गुरव, ता. १५ ः श्रावस्ती बुद्ध विहाराच्यावतीने पवित्र वर्षावासानिमित्ताने जागतिक वारसा स्थळ असलेल्या अजिंठा लेणी येथे एक दिवसीय धम्मयात्रा सहलीचे आयोजन करण्यात आले. ही सहल अत्यंत शिस्तबद्ध व उत्साहात पार पडली. सहलीत लहानांपासून ज्येष्ठांपर्यंत अनेक भाविकांनी सहभाग घेतला.
विहाराचे संस्थापक व अध्यक्ष कैलास बनसोडे यांच्या पुढाकाराने ही सहल आयोजित करण्यात आली.
या यात्रेचा मुख्य उद्देश बौद्ध संस्कृतीचा गौरव, इतिहासाचे दर्शन आणि नव्या पिढीत धम्मविषयक जाणीवा जागविणे हा होता. अजिंठा लेणीतील बुद्ध चरित्रावर आधारित भित्तिचित्रे, प्राचीन शिल्पकला आणि बौद्ध स्थापत्यशैली पाहून उपस्थित भाविक भारावून गेले. यात्रेदरम्यान त्रिशरणपाठ, बुद्धवंदना, सामूहिक ध्यान आणि मार्गदर्शकांच्या साहाय्याने लेण्यांचा ऐतिहासिक व धार्मिक अभ्यासही करण्यात आला. शांत, सात्त्विक वातावरणात सहलीचा अनुभव आध्यात्मिक उन्नती देणारा ठरला. श्रावस्ती बुद्ध विहारचे कार्यकर्ते, सदस्य व भाविकांनी उत्कृष्ट संयोजन करून या उपक्रमात आपले योगदान दिले.
PMG25B02597