पिंपळे सौदागर, ता. ३ ः ‘‘वाढत्या वयातील मूत्रविकार टाळण्यासाठी पाण्याचे योग्य प्रमाणात सेवन करणे, संतुलित आहार ठेवणे तसेच निर्व्यसनी राहणे गरजेचे आहे’’, असा सल्ला सुप्रसिद्ध मूत्ररोगतज्ज्ञ डॉ. मयूर नारखेडे यांनी दिला.
पिंपळे सौदागर येथील ऑल सीनियर सिटीझन असोसिएशनच्या वतीने आयोजित ‘ज्येष्ठांमधील मूत्रविकार’ या विषयावर मार्गदर्शन करताना ते बोलत होते. नगरसेविका डॉ.कुंदा भिसे, असोसिएशनचे अध्यक्ष डॉ. सुभाषचंद्र पवार यावेळी उपस्थित होते. या कार्यक्रमात ऑल सीनियर सिटीझन असोसिएशनच्या नामफलकाचे अनावरण करण्यात आले. या कार्यक्रमात प्रारंभी रविंद्र संदानशिवे, सुभाष विधाते, सुहास पाटोळे, नीता गुप्ता, रेखा येळंमकर यांनी हिंदी, मराठी गाणी सादर केली. भामिनी महाले, निर्मला कासार आणि शोभा राजगुरे यांनी सूत्रसंचालन केले; तर उपाध्यक्ष अनिल कुलकर्णी यांनी आभार मानले. कार्यक्रमाच्या यशस्वितेसाठी दिलीप चौगुले, अनिलकुमार शाह, विवेकानंद लिगाडे, रमेश चांडगे, अशोक कलाल, विमल मोंढेकर या पदाधिकाऱ्यांनी परिश्रम घेतले.