सोमाटणे, ता. ६ ः द्रुतगती मार्गालगतचे जाहिरातफलक वाऱ्यामुळे कोसळून अपघात होण्याचा धोका आहे. त्यामुळे रस्तेविकास महामंडळाने धोकादायक फलक हटवावेत, अशी मागणी ग्रामस्थ व वाहनचालकांनी केली आहे.

पुणे-मुंबई महामार्गावरील किवळे येथील जाहिरात फलकामुळे झालेल्या दुर्घटनेनंतर रस्तेविकास महामंडळाने तातडीने पुणे-मुंबई द्रुतगती मार्गालगत आपल्या हद्दीत असलेले जाहिरातफलक हटविले. त्यामुळे भविष्यात जाहिरातफलक कोसळून होणाऱ्या अपघाताचा धोका काहीसा कमी झाला, परंतु तो संपला नाही. याचे कारण द्रुतगती मार्गालगतच्या खासगी जमिनीवर संबंधित जमीन मालकांनी रस्त्यालगत अजस्त्र जाहिरातफलक उभारले आहेत. हे जाहिरातफलक संबंधित जमीन मालकांच्या मालकी हद्दीत असल्याने त्यावर कोणी कारवाई करायची हा प्रश्न आहे. परिणामी सध्या द्रुतगती मार्गालगत अनेक धोकादायक जाहिरात फलक आहेत. वादळी वाऱ्यामुळे ते रस्त्यावर कोसळण्यीची भीती असल्याने हटविण्याची मागणी ग्रामस्थांनी केली आहे.

PNE23T47580