पिंपरी, ता. २८ : समता सैनिक दलाच्या वतीने संविधान दिनानिमित्त ‘वॉक फॉर संविधान’ हा कार्यक्रम घेण्यात आला. या वेळी ‘छत्रपती ते घटनापती’ अशी पदयात्रा काढण्यात आली. संविधानाच्या जयघोषाने शहर दुमदुमले होते.
या पदयात्रेचा मुख्य उद्देश भारतीय संविधानातील मूलभूत अधिकार आणि कर्तव्ये, शाई ते लोकशाही सामान्य नागरिकांपर्यंत पोहोचवणे हा होता. त्याची सुरुवात दापोडी येथून करण्यात आली होती. त्यानंतर पिंपरी-चिंचवड शहरातील विविध भागात आपल्या मूलभूत अधिकाराची माहित असलेले तब्बल एक लाख पत्रक घरोघरी पोहोचवण्यात आले. पदयात्रेत विविध सामाजिक संघटना, पक्ष, मंडळे तसेच मोठ्या संख्येने नागरिकांनी सहभाग नोंदविला. प्रत्येक चौकात भारतीय संविधानाच्या प्रास्ताविकेचे वाचन करून ही पदयात्रा काढण्यात आली. ही पदयात्रा अनुक्रमे शहरातील दापोडी, कासारवाडी, लांडेवाडी, पिंपरी, आनंदनगर, रामनगर, दत्तनगर, विद्यानगर, मोहननगर, प्राधिकरण, आकुर्डी, गांधीनगर, खराळवाडी, नाणेकर चाळ, वैशालीनगर, पत्रा शेड, रमाबाईनगर, बोपखेल आदी भागातून काढण्यात आली.
या वेळी पिंपरी गावातील छत्रपती शिवाजी महाराज यांच्या पुतळ्याला पुष्पहार अर्पण करून या पदयात्रेची सुरुवात करण्यात आली. याप्रसंगी चौकात संविधानाच्या उद्देशिकेचे वाचन करण्यात आले. तसेच डॉ. बाबासाहेब आंबेडकर स्मारकाला पुष्पहार अर्पण करून या पदयात्रेचा समारोप झाला. या पदयात्रेत भारतीय सैन्याची तुकडी, महार बटालियनच्या यश-सिद्धी आजी-माजी सैनिक, बहुउद्देशीय वेल्फर असोसिएशन महाराष्ट्र राज्य माजी सैनिकांच्या वतीने मानवंदना देण्यात आली. या पदयात्रेचे आयोजन समता सैनिक दलाचे सैनिक मनोज गरबडे यांनी केले होते.