सोमाटणे, ता. १५ ः शेलारवाडी येथील अमरजाई माता, दारुंब्रे येथील वाघजाई माता व सोमाटणे येथील चौराई माता येथे आज विविध धार्मिक कार्यक्रमांनी घटस्थापना करण्यात आली.
नवरात्रोत्सवानिमित्त आज सकाळी दहा वाजता मावळ तालुक्याचे श्रद्धास्थान असलेल्या शेलारवाडी येथील अमरजाई माता मंदिरात अमरदेवी देवस्थान ट्रस्टचे अध्यक्ष लहुमामा शेलार व कॅन्टोन्मेंट बोर्डाचे माजी उपाध्यक्ष रघुवीर शेलार, नीलेश भेगडे, सुहास माळी, बाळासाहेब शेलार, दत्तात्रेय माळी, सूर्यकांत सुर्वे, अजय लांगे आदींच्या हस्ते दुग्धस्नान, महाअभिषेक करून घटस्थापना करण्यात आली. पुढील नऊ दिवस दररोज पहाटे, दुपारी व सायंकाळी आरती, महाप्रसाद, पारायण, भजन, प्रवचन आदी धार्मिक कार्यक्रमांचे आयोजन करण्यात आले आहे.
दारुंब्रे, कासारसाई येथील भाविकांचे श्रद्धास्थान असलेल्या वाघजाई माता मंदिरात देवस्थानच्या वतीने आज सकाळी अकरा वाजता धार्मिक कार्यक्रमांनी घटस्थापना करण्यात आली.
सोमाटणे गावचे श्रद्धास्थान असलेल्या चौराई डोंगरावरील चौराई माता मंदिरात उत्सव समितीचे अध्यक्ष राकेश मुऱ्हे यांच्या हस्ते घटस्थापना करण्यात आली. पुढील नऊ दिवस धार्मिक कार्यक्रम होणार आहेत.