पिंपरी, ता. १० : रस्त्याने जाणाऱ्या महिलेवर एकाने भररस्त्यात धारदार शस्त्राने वार केला. भोसरीतील पीएमटी चौकाजवळ घडलेल्या या घटनेत महिला गंभीर जखमी झाली आहे. माया बिऱ्हाडे (वय ३८, रा. गवळीनगर, भोसरी) असे या हल्ल्यात जखमी झालेल्या महिलेचे नाव आहे.
बिऱ्हाडे या सोमवारी (ता. १०) सायंकाळी सहाच्या सुमारास पीएमटी चौकाजवळील एका शाळेजवळील गल्लीतील रस्त्याने जात होत्या. त्यावेळी एकाने चाकूसारख्या शस्त्राने महिलेच्या मानेवर वार केला. दरम्यान, परिसरातील नागरिकांनी उपचारासाठी त्यांना तातडीने जवळच्या रुग्णालयात दाखल केले. हल्ला केल्यानंतर हल्लेखोर पसार झाला. घटनास्थळी दाखल झालेल्या पोलिसांनी हल्लेखोराचा शोध सुरू केला. हल्लेखोर हा त्यांच्या ओळखीचा असल्याचे समोर येत आहे. मात्र, हा हल्ला कोणत्या कारणावरून केला? हे स्पष्ट झालेले नाही. रात्री उशिरापर्यंत भोसरी पोलिस ठाण्यात गुन्हा दाखल करण्याचे काम सुरू होते.