पिंपरी, ता. २९ : मेडिकलमधून पिण्याच्या पाण्याची बाटली घेतल्यानंतर त्याचे पैसे मागितल्याच्या रागातून कोयता गॅंगने तरुणावर कोयत्याने प्राणघातक हल्ला केला. मेडिकलची तोडफोड करीत नुकसान केले. ही घटना पिंपरीतील मेडीमार्ट मेडिकल शॉप येथे घडली.

याप्रकरणी अर्जुन नानकचंद वाल्मीकी (वय २७, रा. अशोकनगर, लिंकरोड, पिंपरी) यांनी फिर्याद दिली आहे. त्यानुसार मोहित सिंग (वय १९), अनिकेत हातमकर (वय १९), राहुल यादव (वय १९), साईनाथ पाटोळे (वय १९) यांना पोलिसांनी अटक केली असून, एका अल्पवयीन आरोपीला ताब्यात घेतले आहे. तर किरण प्रकाश डोंगरे (वय १९, रा. मिलिंदनगर, पिंपरी), अवि निंबाळकर (वय १९) व इतर दहा जणांवर गुन्हा दाखल आहे.
फिर्यादी हे मेडीमार्ट मेडिकल शॉपमध्ये काम करीत असताना, या टोळीतील एकाने पिण्यासाठी पाण्याची बाटली घेतली. त्यानंतर फिर्यादीने या बाटलीचे पैसे मागितले. याचा राग आल्याने आरोपींनी ‘तुला आता सोडणार नाही, तुला खल्लास करून टाकतो. के.डी.भाईच्या पोरांना पैसे मागतो का, आताच खराळवाडीत एकाला फोडून आलो आहे, तोडफोड केलीय. त्याप्रमाणेच तुझ्या मेडिकलला फोडू, इथे फक्त केडी भाईचा राज आहे.’ असे धमकावत जबरदस्तीने मेडिकलमध्ये शिरले. फिर्यादीवर कोयत्याने वार करून, दुकानातील फ्रिजवर ठेवलेली अडीच हजारांची रोकड व फ्रीजमधील कोल्ड्रिंक्‍सच्या बाटल्या घेतल्या. तसेच काऊंटरची काच कोयत्याने फोडली. कोयता हातात मिरवून परिसरात दहशत माजवली.