पिंपरी, ता. ११ : आमदार महेश लांडगे यांनी तब्बल १ लाख ३७ हजार लोकांना ८ हजार किलो मटण, ८ हजार किलो चिकनचे जेवण देऊन, पाच कोटींची आखाड पार्टी साजरी केली. यातून भाजपने नव्या संस्कृतीचा पायंडा पाडला आहे. अशा पार्ट्यांसाठी इतका मोठा पैसा येतो कुठून ? की जनतेच्या पैशांची ही उधळपट्टी आहे, असा सवाल राष्ट्रवादी काँग्रेसचे प्रवक्ते रविकांत वरपे यांनी उपस्थित केला आहे.
वरपे यांनी प्रसिद्धिपत्रकात म्हटले आहे, की एवढा मोठा खर्च कशाच्या माध्यमातून केला जातो. एक आमदार एक लाख ३७ हजार लोकांना कसे काय जेवण घालू शकतो? त्यांना ते कसे काय परवडते ? एवढा पैसा आला कुठून ? साध्या साध्या व्यवहारांची चौकशी करणारी इडी एवढ्या मोठ्या जेवणावळीची चौकशी करणार आहे का ? की भाजपच्या लोकांना हे सर्व माफ असते.’’