वाकड, ता. २७ : थेरगावमध्ये आज सकाळी ‘बीआरटी’त पोलिसांची गाडी बंद पडल्याने पीएमपीच्या तीन- चार बसगाड्या अडकून पडल्या. त्यामुळे अनेक प्रवाशांचा पाऊणतास खोळंबा झाला. ही घटना सोळा नंबर बस थांब्यावर घडली.
ऐन घाईच्या आणि गडबडीच्या वेळी हा प्रकार घडल्याने सुमारे दीडशे ते दोनशे जणांना मोठी डोकेदुखी ठरली. काही प्रवाशांनी बंदिस्त असलेल्या बीआरटी मार्गातील बॅरिकेड्सवरून उड्या मारून मुख्य रस्ता गाठण्याचा निर्णय घेतला. खासगीसह अन्य वाहने पकडली. मात्र, महिला, अपंग व ज्येष्ठ प्रवाशांना ही कसरत शक्य नव्हती. त्यानंतर काही बसचालक, वाहक, प्रवासी व यांच्या मदतीने पोलिसांचे वाहन बाजूला करण्यात आले. हे वाहन कोणत्या पोलिस ठाण्याचे अथवा विभागाचे होते, हे कळू शकले नाही.