पिंपरी, ता. ३१ ः अष्टविनायक दर्शनाला जाण्याची अनेकांची भाविकांची इच्छा असते, पण महागलेल्या प्रवास खर्चामुळे जाणे टाळतात. यामुळे एस. टी. महामंडळातर्फे दर संकष्ट चतुर्थीच्या दिवशी अष्टविनायक दर्शनासाठी बसची सोय करून दिली आहे. यासाठी शहरातील वल्लभनगर आगारांमधून अष्टविनायक दर्शन यात्रा बस गुरुवारी (ता.३) सकाळी साडेसहाला रवाना होणार आहे.

शहरांमधून अष्टविनायक दर्शनासाठी जाणाऱ्या भाविकांची संख्या मोठ्या प्रमाणात आहे. यंदा जानेवारी महिन्यातील अंगारकीला आगारांमधून अष्टविनायक दर्शनासाठी आठ बस सोडण्याचा विक्रम झाला. त्याला भाविकांचा प्रतिसाद पाहता वेळेवर बसची आगाऊ नोंदणी केली जाते. अष्टविनायकसाठी दोन बसची सोय केली आहे. त्यापैकी एका बसचे बुकिंग फुल्ल झाली आहे. अष्टविनायक दर्शन सेवेत थेऊर, मोरगाव, सिद्धटेक, रांजणगाव, लेण्याद्री, महाड, पाली अशी पॅकेज टूर जाहीर झाली आहे. दोन दिवसांच्या या अष्टविनायक दर्शनासाठी पिंपरी-चिंचवड ते अष्टविनायक प्रवासादरम्यान प्रौढांना १०००, तर लहान मुलांसाठी पाचशे रुपये तिकीट दर आकारण्यात येत आहे. यासाठी बस स्थानकावर अथवा महामंडळाच्या www.msrtc.gov.in या संकेतस्थळावर आरक्षणाची सोय केली आहे.

या दोन दिवसांच्या प्रवासादरम्यान दर्शनासाठी आलेल्या भाविकांसाठी ओझर येथे राहण्याची व जेवणाची व्यवस्था करण्यात आली आहे. प्रवाशांना हा खर्च वैयक्तिक करावा लागणार आहे. तरी भक्तांनी या सेवेचा लाभ घ्यावा, असे आवाहन आगार प्रमुख संजय वाळवे यांनी केले आहे. भाविकांनी या सेवेचा लाभ घ्यावा.