पिंपरी, ता. ३१ ः पंतप्रधान आवास योजनेअंतर्गत पिंपरी-चिंचवड महापालिकेने आर्थिक दुर्बल घटकांसाठी मोशीतील बोऱ्हाडेवाडी येथे एक हजार २८८ सदनिकांचा प्रकल्प उभारला आहे. त्याचे लोकार्पण पंतप्रधान नरेंद्र मोदी यांच्या हस्ते मंगळवारी (ता. ३१) ऑनलाइन होणार आहे. यासह पुणे व पिंपरी-चिंचवड महापालिकांच्या विविध प्रकल्पांचे भूमिपूजन व लोकार्पण कार्यक्रम शिवाजीनगर येथील पोलिस कवायत मैदानावर होईल. तिथे बोऱ्हाडेवाडी प्रकल्पातील लाभार्थींना प्रातिनिधिक स्वरूपात घरांची चावी दिली जाणार आहे. या कार्यक्रमासाठी सर्व लाभार्थींना सपत्निक निमंत्रित केले असून, त्यांची संख्या दोन हजारांवर आहे. त्यांच्या प्रवासासाठी महापालिकेने पीएमपीच्या ३८ बसगाड्यांची व्यवस्था केली आहे, अशी माहिती अतिरिक्त आयुक्त उल्हास जगताप यांनी दिली.
--