पिंपरी, ता. २५ : महापालिकेच्या जागेवरील भोसरी एमआयडीसी ‘टी’ ब्लॉक येथे केलेले अतिक्रमण तत्काळ काढावे, अशी मागणी राष्ट्रवादी काँग्रेस पार्टी झोपडपट्टी विभागाचे पिंपरी-चिंचवड शहराध्यक्ष संतोष निसर्गंध यांनी आयुक्त शेखर सिंह यांच्याकडे केली आहे.
एमआयडीसी ‘टी’ ब्लॉकमधील जय भवानी माता इंजिटेक प्रा. लि. भूखंड क्रमांक १४९//१, १५०, १५१, १५२, १५३ व एम. के. प्रोसेस सिस्टीम प्रा. लि. भूखंड क्रमांक. ई-६ एमआयडीसी भोसरी येथील दोन्ही कंपन्यांनी महापालिकेच्या जागेवर अतिक्रमण केले आहे. यामुळे या ठिकाणावरून ये-जा करणाऱ्या नागरिकांना प्रचंड त्रास सहन करावा लागत आहे. महापालिका ज्या पद्धतीने गोरगरीब जनतेच्या टपरी, हातगाडी व छोटे मोठे अतिक्रमण यांच्यावर तत्परतेने कारवाई करीत आहेत, तशाच प्रकारची तत्परता दाखवून वरील दोन्ही ठिकाणचे केलेले अतिक्रमण काढावे, अशी मागणी निसर्गंध यांनी केली आहे. अन्यथा, तीव्र आंदोलन करेल, असा इशाराही त्यांनी निवेदनात दिला आहे. निवेदनाची प्रत ‘ह’ प्रभाग क्षेत्रीय कार्यालयाच्या सहायक आयुक्तांनाही दिलेली आहे. ‘ह’ क्षेत्रीय कार्यालयाचे अतिक्रमण विभागाचे अधिकारी चंद्रकांत उचे यांना संपर्क साधला असता ते उपलब्ध झाले नाहीत.