तळेगाव दाभाडे (स्टेशन), ता. १८ : कौशल्य विकासाच्या संक्रमणकाळात विद्यार्थ्यांनी स्वयंक्षमता ओळखून शिक्षण-प्रशिक्षणातील संधीतून व्यक्तिमत्त्व विकासाचा प्रयत्न करावा. यशाकडे नेणारा तो मार्ग आहे, असे आवाहन सनदी लेखापाल प्रीतम माहुरे यांनी केले. इंद्रायणी महाविद्यालयाच्या बीबीए, बीसीए विभागातर्फे सोमवारी (ता. १४) आयोजित कार्यशाळेत लाइफ लेसन्स’ विषयावर ते बोलत होते. संस्था अध्यक्ष रामदास काकडे, कार्यवाह चंद्रकांत शेटे, संजय साने, प्राचार्य डॉ. एस. के. मलघे आदी उपस्थित होते.
विद्यार्थीदशेतील जगणे आणि मिळणाऱ्या अनुभवांचा फायदा आयुष्याच्या उभारणीसाठी करून घेण्याबाबत माहुरे यांनी मार्गदर्शन केले. उद्‍घाटन सत्रात काकडे म्हणाले, की अनुभवांना डोळसपणे सामोरे गेल्यास यश हमखास मिळते. विद्यार्थ्यांच्या सर्वांगीण विकासासाठी संस्था कटिबद्ध आहे. विभागप्रमुख प्रा. विद्या भेगडे यांनी प्रास्ताविक केले. प्रा. स्नेहल मसूरकर यांनी सूत्रसंचालन केले. प्रा. योगिता दहिभाते यांनी आभार मानले.