पिंपरी, ता. २१ ः सामाजिक दायित्व असलेली माणसे विखुरलेल्या स्वरूपात का असेना समाजात आहेत, ती आता संस्थेच्या माध्यमातून उपेक्षित, वंचितांच्या उन्नतीसाठी उपक्रम राबवत आहेत, समस्या निवारण करत आहेत. हे मानवतावादी महान कार्य आहे. आम्ही अशा संस्थांना मदतीचा हात देऊ, असे आश्वासन काशीधाम मंगल कार्यालयाचे संचालक व संस्थेचे सल्लागार अवधूत कुलकर्णी यांनी ‘वुई टूगेदर’ फाउंडेशनच्या वार्षिक सर्वसाधारण सभेत दिले.

चिंचवड येथे झालेल्या मेळाव्याचे उद्‍घाटन अवधूत कुलकर्णी यांच्या हस्ते करण्यात आले. शहरातील सामाजिक कार्यकर्त्यांनी कोरोना काळात वुई टूगेदर फाउंडेशन या संस्थेची स्थापना केली. संस्थेच्या वतीने मावळ आदिवासी दुर्गम व गरीब वस्त्यांमध्ये सेवा सक्षमीकरण केंद्रे चालवली जातात. विधवा, एकल महिला, घरेलू महिलांसाठी आधार समुपदेशन, रोजगार माहिती विनिमय, कायदा साहाय्य मार्गदर्शन, जन आरोग्य वैद्यकीय सेवा, जीवरक्षक औषधे, जीवनावश्यक अन्नधान्य बँक, उच्च व परदेशी शिक्षण मार्गदर्शन विविध प्रकारची समूह सेवा केंद्रे शहरात संस्थेचे कार्यकर्ते चालवत आहेत.

संस्थेचा द्वितीय वार्षिक मेळावा नुकताच झाला. या वेळी नवीन कार्यकारिणीची घोषणा करण्यात आली. या कार्यकारिणीच्या अध्यक्षपदी सलीम सय्यद, सचिवपदी शंकर कुलकर्णी, खजिनदारपदी दिलीप चक्रे यांची निवड करण्यात आली. तसेच डॉ. किशोर खिल्लारे, प्रा. डॉ. राजेंद्र कांकरिया, सीता ताई केंद्रे, मधुकर बच्चे, रोहन चव्हाण, अवधूत कुलकर्णी यांची सल्लागार समितीत निवड करण्यात आली. संस्थेचे संस्थापक क्रांतिकुमार कडुलकर यांनी प्रास्ताविक केले. तर श्रीनिवास जोशी यांनी सूत्रसंचालन केले. संयोजन भावीन भंडारी, योगेश गोंठे, मनीषा लाटकर, राजेंद्र महाले, रुकसाना काझी, शैलजा कडुलकर यांनी केले.