पिंपरी, ता. १४ ः विश्व हिंदू परिषदेतर्फे वारकऱ्यांसाठी पंढरपूरपर्यंत मोफत आरोग्यसेवा आणि औषधोपचाराचा उपक्रम गेल्या ३७ वर्षांपासून राबविण्यात येत आहे. यंदाच्या आरोग्यसेवेचा प्रारंभ मंगळवारी झाला. आरोग्य व वैद्यकीय पथकाच्या १० रुग्णवाहिका, २८ डॉक्टर्स, २४ परिचारिका आणि ८० कार्यकर्ते सहभागी झाले आहेत, अशी माहिती परिषदेचे प्रांतमंत्री प्रा. संजय मुद्राळे आणि सहमंत्री ॲड. सतीश गोरडे यांनी दिली.
संत निवृत्तीनाथ पालखी मार्गावर आठ दिवसांपूर्वीच तीन रुग्णवाहिका देऊन आरोग्यसेवा सुरू केली आहे. पुण्यातून संत ज्ञानेश्वर महाराज पालखी मार्गावर तीन, संत तुकाराम महाराज पालखी मार्गावर तीन आणि डॉक्टरांची ने-आण करण्यासाठी एक अशा रुग्णवाहिका दिल्या आहेत. पुणे महापालिका अन्न आणि औषध प्रशासन अतिरिक्त आयुक्त श्याम प्रतापवार यांच्या हस्ते प्रारंभ झाला. ग्लोबल बायोटेक कंपनीचे प्रमुख गिरीश जैवाल, प्रांताध्यक्ष पांडुरंग राऊत, किशोर चव्हाण, मनोहर ओक, धनंजय गायकवाड, विजय कांबळे, राजेश कोंढरे आदी उपस्थित होते.