पिंपरी, ता. १४ ः निगडीतील भक्ती-शक्ती चौकाजवळ उभारलेल्या महात्मा बसवेश्वर महाराज पुतळ्याचे अनावरण मुख्यमंत्री एकनाथ शिंदे यांच्या हस्ते शुक्रवारी (ता. १६) दुपारी चार वाजता होणार आहे. शहरात महात्मा बसवेश्वर महाराजांचा पुतळा बसवावा, अशी मागणी लिंगायत समाजाने केली होती. त्यासाठी पुतळा समितीची निर्मिती केली. या समितीने लोकवर्गणीतून महात्मा बसवेश्वर महाराजांचा पुतळा बनवून घेतला आहे. बारा फूट उंचीचा ब्रॉन्झचा ईस्टलिंग धारक पुतळा आहे. शिल्पकार पंकज तांबे यांनी पुतळा बनविला असून, २७ लाख रुपये खर्च आला आहे. महापालिकेने यासाठी जागा, सीमा भिंत, पुतळ्यासाठी चौथारा, सुशोभीकरण, विद्युत व्यवस्था व उद्यानाची निर्मिती केली आहे, अशी माहिती महात्मा बसवेश्वर पुतळा समितीचे अध्यक्ष तथा माजी नगरसेवक नारायण बहिरवाडे यांनी दिली.
--