पिंपरी, ता. २४ : मतदारसंघात सुसज्‍ज रस्‍त्‍यांची निर्मिती करणे, अत्‍याधुनिक रुग्णालय, उड्डाणपुलांची निर्मिती करून वाहतूक कोंडीवर मार्ग काढणे, यासह शिक्षण, आरोग्य आदीसह विविध मूलभूत सुविधा पुरविण्यासाठी कटिबद्ध असल्‍याचा निर्धार पिंपरीचे आमदार अण्णा बनसोडे यांनी ‘सकाळ’च्‍या प्रतिनिधींशी बोलताना व्‍यक्‍त केला.
आमदार बनसोडे म्‍हणाले की, मतदारसंघात विविध विकासकामे प्रगतिपथावर आहेत. आगामी पाच वर्षाच्‍या काळात ती पूर्ण करायची आहेत. ‘हाफकीन’मधील तृतीय व चतुर्थ श्रेणीच्या कर्मचाऱ्यांना घरे उपलब्ध करून देणार आहे. पिंपरी डेअरी फार्म येथे होत असलेला पूल लवकर पूर्णत्वास होण्यासाठी पाठपुरावा करणार. कुटे हॉस्पिटल, जिजामाता हॉस्पिटल या ठिकाणी महात्मा फुले जन आरोग्य योजना लागू करणार व या ठिकाणी सर्व प्रकारची शस्त्रक्रिया सुरू करता येतील, यासाठी पाठपुरावा चालू आहे. प्राधिकरण व आकुर्डी भागातील वीज पुरवठा सुरळीत राहावा, यासाठी नवीन उपकेंद्र उभारणार. वल्लभनगर एसटी स्टॅंड व डेपोचा पुनर्विकास करण्यात येणार आहे. शाहूनगर, संभाजीनगर येथे पर्यटन केंद्र उभारणार असल्‍याचे बनसोडे यांनी सांगितले.
गेल्या पाच वर्षात केलेली विकासकामे, नागरिकांचे प्रेम, आशीर्वाद सोबतीला घेऊन मी या निवडणुकीला सामोरे गेलो होतो. पुढील पाच वर्षे शहराच्या विकासासाठी कटिबद्ध असून सर्व समाजातील नागरिकांच्या सेवेस असणार आहे, असे बनसोडे यांनी सांगितले.

विकासाचा अजेंडा
१) दापोडी ते निगडी मंजूर झालेल्या रस्त्याचे काम पूर्ण करणार
२) प्राधिकरणामधील हरित सेतूची मंजूर कामे प्रत्‍यक्षात साकारणार आहे.
३) निगडी ते दापोडी एक हजार मिलिमीटर व्यासाची नवीन पाइप लाईन टाकण्याचे काम पूर्ण करणार
४) दुर्गा देवी टेकडीवर निवासी योग व निसर्गोपचार केंद्र सुरू करणार
५) झोपडपट्टी पुनर्वसन प्रकल्पात प्रत्येक कुटूंबागणिक हक्‍काचे घर देण्यासाठी प्रयत्नशील राहणार आहे. फोटोः 65507